پنجابیکا اکیڈمی ولوں پہلاآن لائن مشاعرا،مشاعرے دی صدارت رائے محمدخان ناصر نے کیتی،مشاعرے دے مجمان اعظم ملک سن ۔۔۔۔۔٭رویل نیوز٭

پنجابیکا اکیڈمی دی چھتر چھاویں پہلا آن لائن مشاعراہویا جس دی صدارت ننکانہ صاجب توں تعلق رکھنے والے پنجابی شاعر رائے محمد خا ن ناصر کیتی۔ مشا عر ے دے مجما ن پنجابیکا اکیڈمی دے ڈائریکٹر اعظم ملک سن۔ مشاعرے وچ رلت کر کے اپنا کلام سنان والیاں وچ کراچی توں توقیر چغتائی، لاہور توں نصیر احمد تے بینا گوئندی، فصیل آباد توں صفیہ حیات، میاں چنوں توں عدنان آصف بھٹا، چیچہ وطنی توں بدر سیماب تے بہاولنگر توں صغیر تبسم ایس توں وکھ کھاریاں توں نیئر صدیقی شامل سن۔کجھ شاعراں دا کلام ونگی دے طور تے پڑھنہاراں نوں پیش کیتا جا رہیا اے۔

نظم:کدوں کُو تیکر

رائے محمد خاں ناصر

موتے بھیڑیے نہیوں چنگے

جیون نال ایہ واہدھے جیہڑے

کردی رہی ایں،کردی پئی ایں

کِناں کو چر تیری ششکر

ڈر دی واہر نوں کھجل کرنا یں

جیون الے اُنگل کر کے

موتے بھیڑیے کدوں کوتیکر

اَکھ نوٹیجی،انھی راہنایں،کجھ نہیں دِسنا

کِنا ں کو چرسِک ملن دی، سِکدیاں راہنا

لُک کے باہنا یں

کِنا ں کو چر،کدھاں جیون،ویڑھا موت

کِناں کُو چر،رَتے بیر اُڈیکن رُوڑے

کِناں کُو چررَسیاں تُوتاں دے ڈِھگ،مکھیاں کھانے

موتے بھیڑیے کِناں کُو چر

حشر دے گھر اچ،حشر دی تھاہرے توں راہنا یں

گھر آلے گھر آ نہیں جاندے

جنا ں کو چر رب اوہلا اے ,سبھ اوہلا اے

٭٭٭٭٭

غزل

بینا گوئندی

اکھ کھلی تے یار گوا یا

چنگا نہیں سی ستّی ریندی

بھانبڑہنجواں ہور مچایا

چنگا نہیں سی رسی ریندی

تیری تون تے کانوں بیٹھی

چنگا نہیں سی پکھی ریندی

شیشے اَگے ناں ای بیندی

چنگا نہیں سی بتی ریندی

منڈی ہور اتاُں چڑھ گئی اے

چنگا نہیں سی مندی ریندی

کھیڑیاں نال نبھا کردی تے

سولی اتے ٹنگی رہندی

٭٭٭٭٭

غزل/ اعظم ملک
قیدیاں وانگوں عمر ہنڈائی جانے آں
اپنے گھر نوں جیل بنائی جانے آں
ساہ دا بھار جے چاء نہیں ہوندا ساڈے توں
فیر امبر کیوں سر تے چائی جانے آں
ساڈے ورگا کد کوئی جھلا ہونا ایں
سپاں نوں وی ددھ پیائی جانے آں
اس گلی چوں ہور تے کجھ وی لبھیا نہیں
جگ دے طعنے جھولی پائی جانے آں
اعظم اپنی جنت ورگی وستی نوں
اپنے ہتھیں تیلی لائی جانے آں

٭٭٭٭

غزل /صغیر تبسم
دلاں وچ کھبھ جاوے یار والا قافیہ
ایہو جہیا دس مینوں پیار والا قافیہ

سدھی سدھی گل ہووے سدھا سدھا شعر جی
کاہدے لئی الیکنا کھلار والا قافیہ

پیار دی ردیف ہووے نشیاں دی بحر وی
اکھیاں تے بنھ دے خمار والا قافیہ

نقداں چ لبھ جاندی ہر چیز ودہیا
بنھیا نی ایسے لئی ادھار والا قافیہ

ہجراں دی پیڑ اساں لکھ لکھ مر گئے
لبھیا نہ قول تے قرار والا قافیہ

آپنے دو ٹکیاں نوں سانبھ کے توں رکھ لے
کدی وی نہیں دینا میں ہزار والا قافیہ

تیرے رنگ روپ نوں الیکنا اے سوہنیا
لبھ کے لے آیاں واں بہار والا قافیہ

٭٭٭٭٭

غزل/ بدر سیماب
یاد تری جد آ جاندی اے
مینوں پڑھنے پا جاندی اے

روز بناواں ریت گھروندے
وا پُرے دی ڈھاہ جاندی اے

رب دے قہر توں ڈر او ظالم
ست اسمانی ہاہ جاندی اے

دشمن تاں فر دشمن ہوئے
متراں دی گل کھا جاندی اے

ساڈا ساک گوارا نہیں ، تے
اوہ پئی سجنا! راہ جاندی اے
٭٭٭٭٭
ویرے میریاں پیلیاں/صفیہ حیات

نکے بھتیجے نوں
دِتے میرےروپیے
ویرے نے
کھوہ کے
میرے ہتھ تے رکھے تے بولیا
" جھلیے تینوں پتا دِھیاں کولوں
اسیں کجھ نہیں لیندے"
میں اندروں بولی
"ویرے !میریاں پَیلیا ں"
۔
"ایہ شربت دا گلاس وی چک لے
کملیئے تینوں تے پتا اے
اسیں تےدِھیاں دے گھر دا پانی وی نہیں پیندے"
میں اندروں بولی
"وِیرے میریاں پیلیاں"
********

غزل/ عدنان آصف بھُٹا

بھریِاں پَین تے نھیری چّلی
واھڈے نال دھرو ہویا اے

جِتّن والا دَوڑ چ ای نہیں سی
پھاڈے نال دھرو ہویا اے

ساڈی بولی ماں بولی نہیں
ساڈے نال دھرو ہویا اے

ماڑا کوہیا, رَت ناں نکلی
ڈاڈھے نال دھرو ہویا اے

******

دیوا… (نیئر صدیقی(
میلہ اوج کمال تے چھڈ دے
بن جا یار مثال تے چھڈ دے
کچی عمر دے شوق تمامی
چٹے ہوون وال تے چھڈ دے
اپنے کل دا سانبھا کر توں
مینوں میرے حال تے چھڈ دے
آپنی بال کے سیکن سِکھ لے
جگ نوں جگ دی چال تے چھڈ دے
رشتے ناتے نگھے چنگے
آوے جد ابال تے چھڈ دے
گھر دی لمبڑ داری بیبا
موڈھے آون بال تے چھڈ دے
گہنے کوٹھیاں ، گَل نوں آؤنے
سپاں نوں ناں پال تے چھڈ دے
ہنیریاں نال متکا کاہدا
نیئر دیوا بال تے چھڈ دے

******