ارشاد سندھو دی شاعری

تھاں تھاں رب دی رحمت وسدی کِردا نور سویرے
اج وی آؤندا ساڈے پِنڈ وچ ویکھ سرور سویرے

میں سُنیا جد پتراں پڑھیاں پاک نبی دیاں نعتاں
اللہ اللہ کردا سی ہر رُکھ دا بور سویرے

اوہدا وِرد پکاؤندے پنچھی چوگاں لئی اُڈ جاندے
اوہدی آس تے ٹُر پیندے نیں سبھ مزدور سویرے

قسمے اِک اِک گھر تے قسمے اِک ویڑھے اندر
روز توحیدی تپدا ڈِٹھا میں تندور سویرے

میری جنتی ماں سی قسمے روز مصلّےاُتوں
اُٹھدی پاک دروداں والا بھر کے پور سویرے

آ کے ویکھ نمازاں پڑھدے اج وی اِک مسیتے
ساڈے پنِڈ دے تگڑے ماڑے تے مجبور سویرے

رب سلامت رکھے سندھو چانن ساڈے پِنڈ دا
رب کرے نہ ہون کدی وی ساتھوں دور سویرے