kraamaat@gmail.com
+ +92 333-430-6384


کرونا خلاف احتیاطی تدبیراں نہ کرن اُتے مارکیٹاں نوں تالے لوانے پے گئے،تفصیل جانن لئی۔۔۔۔۔٭رویل نیوز٭


Choose Writer ... May 14, 2020


کراچی‘ لاہور (نمایندا رویل) ایس او پیز دی خلاف ورزی اُتے 3 مارکیٹاں سیل‘ اسسٹنٹ کمشنر تے دُکانداراں وچ تلخ کلامی‘ وڈیاں مارکیٹاں بند کرن اُتے غور شروع۔ تفصیلات مطابق سندھ سرکار ولوں کاروبار کھولن لئی ایس او پیز جاری کیتے گئے سن جہدے بعد کئی وار خلاف ورز ی ویکھن نُوں ملی‘ ایہدے اُتے ایکشن لیندیاں ہویاں ضلعی انتظامیا نے زینب مارکیٹ وچ کارروائی کیتی تے اوہنوں سیل کر دِتا جد کہ ایس دوران اسسٹنٹ کمشنر تے دُکاندارں وچ تلخ کلامی وی ہوئی۔ اسسٹنٹ کمشنر دا کہنا اے کہ ایس او پی دی خلاف ورزی اُتے زینب مارکیٹ نُوں سیل کیتا گیا۔ سینیٹائرز ماسک تے گلووز دُکانداراں نے نہیں پائے سن۔ دوجے پاسے عبداللہ ہارون روڈ اُتے واقع زینب دے بعد وکٹوریا تے انٹرنیشنل مارکیٹ وی سیل کر دِتی گئی‘ مارکیٹاں نُوں ایس او پیز دی خلاف ورزی اُتے سیل کیتا گیا اے جد کہ انتظامیا نے گل پلازا تے طارق روڈ اُتے 3 دُکاناں نُوں وی سیل کر دِتا اے۔ صوبائی وزیر توانائی امتیاز شیخ دا ایس او پیز دی خلاف ورزی کرن والیاں بارے کہنا اے کہ دُکانداراں نُوں 2 دن تک وارننگز دِتی سی اج تیجا دن اے عملدرآمد نہیں ہویا تے کارروائی کیتی گئی‘ افسوس دے نال کہنا پیندا اے ایس او پیز دیاں دھجیاں اُڈائیاں گئیاں نیں‘ تاجراں نے ایس او پیز اُتے عملدرآمد کرن دی یقین دہانی کروائی سی جہدے اُتے مارکیٹاں کھُلیاں عملدرآمد نہ ہویا تے کارروائی کیتی جاوے گی۔ دُکانداراں دا کہنا اے خریداری لئی آن والے گاہک احتیاطی تدبیراں اختیار کرن لئی تیار نہیں‘ اینے رش وچ ایس او پیز اُتے عملدرآمد کرونا مشکل کم اے۔ ایس توں وکھ پنجاب وچ وی حکومتی اقدامات دی خلاف ورزی دے بعد کئی مارکیٹاں نُوں فوری طور اُتے بند تے لاہور وچ ہال روڈ‘ شاہ عالم مارکیٹ‘ انارکلی‘ اعظم مارکیٹ نُوں بند کرن اُتے غور شروع کر دِتا گیا اے۔ وسیلیاں مطابق وزیر اعلا پنجاب سردار عثمان بزدار دی اگوائی وچ اعلا سطحی اجلاس ہویا‘ اجلاس وچ مارکیٹاں دی صورتحال اُتے شدید تحفظات دا اظہار کیتاگیا۔ وسیلیاں مطابق لاہور وچ ہال روڈ‘ شاہ عالم مارکیٹ‘ انار کلی‘ اعظم مارکیٹ نُوں بند کرن اُتے غور کیتا گیا اے‘ اچھرا باار‘ ٹاؤن شپ سنے ہور تھاواں اُتے کوئی حفاظتی اقدامات نہیں‘ حکومت ولوں کرونا دے کیسز ودھن اُتے کئی مارکیٹاں نُوں بند کرن اُتے غور کیتا جا رہیا اے۔ حکومتی وسیلیاں دے مطابق پہلے مرحلے دوران دُکاناں دا چالان ہووے گا‘ فیر دُکاناں بند کراں گے‘ ایس او پیز اُتے عملدرآمد ہوندا وکھائی نہیں د ے رہیا‘ دُکاناں اُتے شدید رَش اے۔ دوجے پاسے کرونا وایرس دی وجھا توں پوری دنیا وچ ہُن تک 43 لکھ 74 ہزار 757 توں ودھ بندے متاثر جد کہ 2 لکھ94ہزار توں ودھ بندے ہلاک ہو چکے نیں جد کہ پاکستان وچ لاک ڈاؤن وچ نرمی کارن اِک ای دن وچ 2255 بندے کرونا دا شکار ہو گئے جہدے بعد کرونا وایرس نال متاثر ہون والیاں دی مجموعی گنتی 35 ہزار توں ٹپ گئی اے جد کہ 761 بندے ہلاک ہو چکے نیں جد کہ امریکا وچ َمَوتاں دی گنتی 83 ہزار توں ٹپ گئی اے۔