لوکائی دے مسئلے فوری حل کیتے جاون،پاکستان پوسٹ فنڈ دے قیام دی اصولی منظوری:وزیراعظم عمران خان۔۔۔۔٭رویل نیوز٭

اسلام آباد (اُچیچا نمایندا رویل) وزیراعظم عمران خان نے کہیا اے کہ عوامی مسئلے فوری حل کیتے جان‘ پارلیمینٹیرینز اپنے متعلقا حلقیاں وچ لوکائی نُوں کرونا وایرس توں بچاء دیاں حفاظتی تدبیراں اختیار کرن دی ترغیب دین جد کہ ممبران ناجایز منافع خوری‘ ذخیرا اندوزی دی روک تھام تے لوکائی نُوں لوڑی دیاں شیواں دی دستیابی نُوں یقینی بنان دے حوالے توں وی ہدایتاں دِتیاں نیں۔ تفصیلات مطابق وزیراعظم نال ممبر قومی اسمبلی رائے اقبال‘ ممبر صوبائی اسمبلی پنجاب سید ضمصام علی شاہ بخاری‘ پچھلے ایم این اے رائے حسن نواز تے ممبر قومی اسمبلی حاجی امتیاز احمد سنے ہوراں نے ملاقات کیتی۔ پارلیمینٹیرینز نے کرونا وایرس دی روک تھام دے حوالے توں وزیراعظم دے وژن دی تعریف کیتی تے لاک ڈاؤن دی مناسب تے متوازن حکمت عملی دی بدولت لوکائی خصوصن غریب تے مزدور طبقے دیاں اوکڑاں وچ کمی لیان دے نال نال اوہناں ایہناں نُوں ریلیف فراہم کرن دے حکومتی اقدامات تے وزیراعظم دی قیادت نُوں خراج تحسین پیش کیتا۔ وزیراعظم عمران خان نے پارلیمینٹیرینز نُوں لوکائی نال مسقبل رابطے وچ رہن تے اوہناں دے مسئلیاں دے فوری حل کرن دی اہمیت اُتے زور دیندیاں ہویاں کہیا کہ ایس ضمن وچ حکومت ہر ممکن وسایل فراہم کرے گی‘ پارلیمینٹیرینز اپنے متعلقا حلقیاں وچ لوکائی نُوں کرونا وایرس توں بچاء دیاں حفاظتی تدبیراں اختیار کرن دی ترغیب دین۔ ایس توں وکھ وزیراعظم دی صدارت ہیٹھ پاکستان پوسٹ ملازمین دی پینشن دے بارے وچ اجلاس وی ہویا‘ وزیراعظم نے پاکستان پوسٹ فنڈ دے قیام دی اصولی منظوری دے دِتی۔ اجلاس وچ وزیراعظم نُوں بریفنگ دِتی گئی کہ پاکستان پوسٹ دے اخراجات دا تقریبن 34 فیصد حصا پینشن اُتے مشتمل اے۔ وزیراعظم نے مجوزا پینشن فنڈ دے قیام دے بارے وچ کمیٹی دے قیام دی منظوری دے دِتی‘ پینشن فنڈ دے قیام تے جامع طریقا کار کابینا وچ حتمی منظوری لئی پیش ہووے گا۔