kraamaat@gmail.com
+ +92 333-430-6384


دیامر بھاشا ڈیم دی اُساری لئی معاہدے مکمل،دیس واسطے  اُچیچا دیہاڑ  یاد گار رہوے گا:فیصل واڈا۔۔۔۔٭رویل نیوز٭


نمائندا رویل May 14, 2020


اسلام آباد (نیوز ڈیسک) دیامر بھاشا ڈیم دی اُساری لئی معاہدے اُتے دستخط ہو گئے‘ وزارت آبی وسایل دے مطابق ڈیم دا ٹھیکا چائنا تے ایف ڈبلیو او دے جوائنٹ وینچر نُوں دے دِتا گیا اے۔ معاہدے اُتے بھاشا ڈیم دے چیف ایگزیکٹو افسر عامر بشیر نے دستخط کیتے۔ پاور چائنا ولوں معاہدے اُتے چینی کمپنی دے نمایندے نے دستخط کیتے۔ دیامر بھاشا ڈیم دے کنٹریکٹ ایوارڈ دی تقریب نال خطاب کردیاں ہویاں وفاقی وزیر برائے آبی وسایل دا کہنا سی کہ اج دا دن ملکی تواریخ دا وڈا دن اے کیوں جے 5 دہاکیاں بعد اینا وڈا منصوبا شروع ہویا اے۔ اوہناں دا ہور کہنا سی کہ ایس معاہدے نال پاک چین دوستانا تعلقات دا نواں باب شروع ہو گیا۔ وزارت آبی وسایل تے واپڈا دیاں کاوشاں نال اج اسیں ایتھوں تک پہنچے آں۔ فیصل واوڈا دا ہور کہنا سی کہ وزیراعظم عمران خان دے وژن مطابق آبی وسایل نُوں محفوظ کراں گے‘ ایس منصوبے نال 4500 میگا واٹ سستی بجلی پیدا ہووے گی‘ دیامر بھاشا ڈیم نال 1.2 ملین ایکڑ زمین آباد ہووے گی۔ وفاقی وزیر آبی وسایل دا کہنا سی کہ امد اے کہ اسیں ویلے توں پہلے دیامر بھاشا ڈیم پورا کراں گے‘ وفاقی وزیر برائے آبی وسایل پاکستان دی ترقی لئی آبی وسایل دے منصوبیاں دی تکمیل چھیتی یقینی بنان گے