موجودا حکومت دی کرونا خلاف حکمت عملی کیہ اے،وزیر اعظم نے بارھاں خطاب کر دتے نیں،ٹائیگر فورس دا کم جنازے چُکنا ہوئے گا:شاہد خاقان عباسی۔۔۔٭رویل نیوز٭

اسلام آباد (بیورو رپورٹ) پچھلے وزیراعظم شاہد خاقان عباسی دا کہنا اے کہ ٹائیگر فورس بنی تے اوہدا کم جنازے چُکنا ہووے گا۔ قومی اسمبلی وچ خیالاں دے اظہار دوران وفاقی وزیر شفقت محمود نے کہیا کہ اپوزیشن ولوں جہڑیاں تقریراں ہوئیاں نیں اوہناں وچ کوئی تجویزاں نہیں دِتیاں گئیاں‘ تجویزاں وچ کرونا نُوں ہدف بنان دی بجائے حکومت نُوں ہدف بنایا گیا‘ ساڈے ملک وچ کرونا دا اینا کھلار نہیں جنا دنیا دے باقی ملکاں وچ اے جد کہ لاک ڈاؤن دی مخالفت کرن والیاں نے دیہاڑی داراں دی پرواہ نہیں کیتی۔ شفقت محمود نے کہیا کہ 18 ویں ترمیم آئین دا حصا اے پر کیہ ایہدا ذکر وی نہ چھیڑیا جاوے‘ سندھ نے جہڑا آرڈیننس گھلیا اوہدے وچ بجلی تے گیس صوبائی سبجیکٹ نہیں سی اوہنوں شامل کیتا گیا‘ اِک پاسے 18 ویں ترمیم دا واویلا تے دوجے پاسے 18 ویں ترمیم دے خلاف اقدامات کیتے گئے۔ پچھلے وزیراعظم شاہد خاقان عباسی نے کہیا کہ ایتھے شوقیا ٹیسٹ ہو رہے نیں‘ کجھ دن پہلے اِک وزیر نے کہیا کہ روزانا 40 ہزار ٹیسٹ ہو رہے نیں‘ کل وزیر خارجا نے دَسیا کہ 20 ہزار دی کیپسٹی اے‘ کون ٹھیک کَہ رہیا اے۔ شاہد خاقان عباسی نے کہیا کہ صرف اِک گل دَس دین کہ موجودا حکومت دی کرونا خلاف حکمت عملی کیہ اے‘ وزیراعظم نے 12 خطاب کیتے نیں کہیا لاک ڈاؤن نہیں لاواں گا‘ لایا فیر کہندے نیں نرم کر دِتا‘ وزیراعظم دَسن اشرافیا کون اے جہنے لاک ڈاؤن کر دِتا‘ وزیراعظم نے جس دن لاک ڈاؤن نہ کرن دا اعلان کیتا اوسے دن اوہناں دے گھر دے باہر کرفیو لگا ہویا سی۔ شاہد خاقان عباسی دا کہنا سی کہ حکومت دے نیڑے کرونا دی سبھ توں وڈی وجھا 18 ویں ترمیم اے‘ شاید ایہ سمجھدے نیں کہ 18 ویں ترمیم ختم کرن نال کرونا کاروبار ختم ہو جاوے گا۔ اوہناں دا کہنا سی کہ ایہ ٹائیگر فورس کیہ شے اے ایہدا بجٹ کون دیوے گا‘ ایہ ٹائیگر فورسن بنی تے ایہدا کم جنازے چُکنا ہووے گا‘ اللہ نہ کرے انج ہووے پر آثار ایہو جہے نیں‘ حکومت دا کیہ اے بھگتے گی لوکائی جویں کھنڈ دے معاملے اُتے لوکائی بھگت رہی اے۔