دہشتگردی  تے آپسی جھیڑیاں دے دور وچ پیپلز پارٹی نوں حکومت ملی سی،اج  دیس دی ایکتا نوں مُکایا جا رہیا اے:آصف زرداری۔۔۔۔۔٭رویل نیوز٭ 

اسلام آباد (نمایندا رویل) پچھلے صدر آصف علی زرداری نے کہیا اے کہ ملک دی ایکتا نُوں پارا پارا کر دِتا گیا اے‘ وزیراعظم آمر حکمران پرویز مشرف دے نقش قدم اُتے چل رہے نیں‘ حکومت کرونا وباء دی بجائے اپوزیشن تے صوبیاں نال لڑ رہی اے‘ صوبیاں دے آئینی تے مالیاتی اختیارات گھٹ کرن دی کوشش کیتی جا رہی اے‘ آن والا ویلا بُہتا خطرناک اے‘ قومی اتفاق رائے ویلے دی ضرورت اے۔ ایہناں خیالاں دا اظہار اوہناں نے پیپلز پارٹی پنجاب دے صدر قمر زمان کایرا نال ٹیلی فونک رابطے دوران کیتا۔ دوہاں آگوواں وچکار ملک وچ جاری مہلک وباء کرونا‘ سیاسی تے پارٹی امور اُتے وچار وٹاندرا کیتا گیا۔ قمر زمان کایرا نے دَسیا کہ آصف زرداری نے کرونا اُتے فکر مند تے حکومتی فیصلیاں اُتے تحفظا ت دا اظہار کیتا۔ پچھلے صدر آصف علی زرداری نے ملک وچ کرونا وایرس دی و دھدی ہوئی گنتی اُتے فکر مندی تے حکومتی فیصلیاں اُتے شدید تحفظات دا اظہار کردیاں ہویاں کہیا کہ بدقسمتی نال حکومت مہلک وباء کرونا نال لڑن دی بجائے اپوزیشن نال ہتھوں پائی ہو رہی اے‘ حکومت نے ملک وچ موجود سارا اتفاق رائے برباد کر دِتا اے۔ حکمران فیر صوبیاں دے آئینی تے مالیاتی اختیارات نُوں گھٹ کرنا چاہندے نیں‘ سانوں ایکے دی ضرورت اے۔ آصف زرداری دا کہنا سی کہ جدوں 2008 وچ پیپلز پارٹی نُوں اقتدار مِلیا تے لک دہشتگردی تے نفاق دا شکار سی‘ اسیں قومی اتفاق رائے نال سوات اپریشن کتیا تے امن لے کے آئے‘ ملک وچ اناج دا بحران سی‘ آٹے اُتے جھیڑے ہو رہے سن‘ اسیں ملک نُوں خوراک وچ خُد کفیل کیتا‘ بدقسمتی نال حکمران مشرف دے نقش قدم اُتے چل رہے نیں تے اِک واری فیر ملک نُوں مشرف دور ول لے کے جارہے نیں۔