کرونا دیس وچ تیزی نال کھلر رہیا اے،کرونا توں ودھ خوف بھکھ تے غربت وچ وادھے دا اے:وزیراعظم عمران خان۔۔۔٭رویل نیوز٭

اسلام آباد (نمایندا رویل)) وزیراعظم عمران خان نے کہیا اے کہ سانوں جس قدر خطرا لاک ڈاؤن توں اے ایس توں کدھرے بُہتا بھُکھ و افلاس توں اے‘پٹرولیم مصنوعات دیاں قیمتاں وچ کمی لیان دا مقصد لوکائی نُوں ریلیف فراہم کرنا سی‘ ایہ فایدا لوکائی تک پہنچان نُوں یقینی بنایا جاوے۔ایہناں خیالاں دا اظہار اوہناں نے کرونا دی صورتحال‘ انسدادِ سمگلنگ تے بنیادی لوڑی دیاں شیواں دیاں قیمتاں دے حوالے توں اعلا سطح اجلاس دی صدارت کردیاں ہویاں کیتا۔کرونا بارے اجلاس وچ صحت دیاں سہولتاں‘ ہسپتالاں دی استعداد وچ وادھے بارے اقدامات دا جایزا لیا گیا‘ طبی آلات دی فراہمی تے پیش ور عملے دی موجودگی یقینی بنان بارے امور اُتے گلبات کیتی گئی جد کہ معاون خصوصی صحت ظفر مرزا نے پورے ملک وچ متاثرین دے آنکڑے‘ مصدقا کیسز‘ جغرافیائی کھلار تے ٹیسٹنگ دی گنتی سنے کیسز وچ وادھے بارے بریفنگ دِتی۔ ایس موقع اُتے وزیراعظم عمران خان دا کہنا سی کہ سانوں بھُکھ تے وباء دی روک تھام لئی حفاظتی اقدامات وچ توازن برقرار رکھنا اے‘ سانوں جناں خطرا لاک ڈاؤن توں اس توں کدھرے ودھ بھُکھ و افلاس توں اے‘ لاک ڈاؤن کرونا دا علاج نہیں سگوں عارضی اقدام اے‘ اسیں اپنے فیصلے زمینی حقایق تے لوکائی دی حالت زار ویکھ کے کرنے نیں۔ وزیراعظم دا کہنا سی کہ سانوں ادراک اے کہ کاروبار دی بندش نال معیشت نُوں ناقابل تلافی نقصان پہنچیا‘ ٹرانسپورٹ دی بندش نال عام بندے دا کاروبار تے آوا جائی شدید متاثر ہوئی‘ جدوں تک معیشت بحال نہیں ہو جاندی‘ غریب و نادرا طبقے دیاں اوکڑاں ودھن گیاں۔ وزیراعظم نے کہیا کہ پولیس لوکائی اُتے سختی دی بجائے دوستانا رویا اختیار کرے‘ حفاظتی تدبیراں اُتے عملدرآمد لئی لوکائی دوست تے اگاہی اُتے مبنی طرز عمل اپنایا جاوے۔ انسداد سمگلنگ تے بنیادی لوڑی دیاں شیواں دیاں قیمتاں دے حوالے توں اجلاس نال خطاب دوران وزیراعظم نے کہیا کہ لوڑی دیاں شیواں دیاں قیمتاں وچ ممکنا کمی لیان لئی صوبائی حکام اقدامات کرن۔ سمگلنگ ملکی معیشت لئی ناسور اے جہڑی ملکی معیشت نُوں 2طریقیاں نال نقصان پہنچاندی اے۔ ایہدے نال ملکی فوڈ سیکیورٹی نُوں خطرات لاحق ہو جاندے نیں۔ اوہناں دا کہنا سی کہ لوکائی دے استعمال دیاں بنیادی لوڑی دیاں شیواں دی تھوڑ پیدا ہون دی وجھا توں لوکائی نُوں اوکڑاں تے پریشانی دا اساہمنا ہوندا اے۔ سمگلنگ دی وجھا توں ملکی صنعت نُوں ناقابل تلافی نقصان پہنچدا اے۔ اوہناں نے واضح کیتا کہ سمگلنگ دے خلاف کارروائی وچ کسے قسم دی رعایت یاں کمپرو مائز نہیں ہووے گا۔ سمگلنگ دی روک تھام تے سمگلنگ وچ ملوث بندیاں خلاف کارروائی دی رپورٹ ہر 15د ن بعد پیش کیتی جاوے۔وزیراعظم نے کہیا کہ پٹرولیم مصنوعات دیاں قیمتاں وچ کمی دا مقصد لوکائی نُوں ریلیف فراہم کرنا سی‘ ایہدا فایدا لوکائی تک پہنچایا جاوے۔