سرکاری حکم دی خلاف ورزی کرن والیاں نوں جرمانے ہوون گے،تِن دن واسطے پنجاب اندر سخت لاک ڈاؤن۔۔۔٭رویل نیوز٭

لاہور (نمایندا رویل)پنجاب وچ لاک ڈاؤن 3 دن لئی سخت‘ لاہور دے کئی راہ کنٹینر لا کے بند کر دِتے گئے‘ جمعا‘ ہفتا تے ایتوار 3 دن تک وڈیاں مارکیٹاں‘ بازار بندرہن گے۔ لاک ڈاؤن اُتے سختی نال عملدرآمد لئی لاہور دے کئی راہ کنٹینر لا کے بند کر دِتے گئے۔ وسیلیاں مطابق داتا دربار‘ سول سیکرٹریٹ تے اردو بازار دے باہر کنٹینرز کھڑے کر دِتے گئے نیں۔ علیؓ دیہاڑ دے حوالے توں وی کنٹینرز نُوں کھڑا کیتا گیا تے راہ بند کیتے گئے نیں۔ اودھر پنجاب سرکار دے اعلا سطح اجلاس وچ وزیر اعلا نُوں اہم معاملات توں اگاہ کر دِتا گیا اے‘ وزیر اعلا نے سوموار توں ایس او پیز دی خلاف ورزی کرن والیاں مارکیٹاں بند کرن دا حکم دے دِتا اے۔ وسیلیاں مطابق مارکیٹاں تے بازاراں وچ ایس او پیز دی خلاف ورزی اُتے وزیر اعلا نُوں رپورٹ پیش کیتی گئی جہدے وچ دَسیا گیا کہ صوبے وچ ایس او پیز دی خلاف ورزی اُتے لاہور سنے ہور وڈے ضلعیاں وچ 456 دُکاناں مارکیٹاں وچ وارننگ تے جرمانے کیتے گئے۔ ایس موقع اُتے وزیر اعلا عثمان بزدار نے متعلقا افسراں نُوں حکم دِتا کہ حکومتی احکامات تے ایس او پیز دی خلاف ورزی کسے صورت برداشت جوگ نہیں۔ جمعا‘ ہفتا تے ایتوار 3 دن پنجاب وچ مارکیٹاں تے بازار بند رکھے جان۔ اوہناں نے سختی نال ہدایتاں جاری کیتیاں کہ سوموار توں جتھے ایس او پیز دی خلاف ورزی کیتی جاوے گی‘ اوہناں بازارں ا تے مارکیٹاں نُوں سیل کر دِتا جاوے۔ دوجے پاسے وفاقی حکومت نے صوبیاں توں پبلک ٹرانسپورٹ بارے سفارشاں منگ لئیاں نیں۔ پنجاب نے سخت ایس او پیز نال ٹرانسپورٹ کھولن دیاں سفارشاں مرتب کر لئیاں جہڑیاں این سی او سی دے اجلاس وچ پیش کیتیاں جان گیاں۔